صوص كاراميل مملح

كتبت في Apr 21 2015 - 11:00pm بواسطة محمد الفارس
صوص كارامل مملح

صوص كارامل مملح

تنبيه: لا تفكرون لمجرد التفكير، انكم تلمسون السكر بعد التسخين عشان تذوقونه مثلاً. السكر لما يتسخن توصل درجة حرارته لـ ٢٠٠ مئوية (٤٠٠ فهرنهايت) ، يعني ضعف حرارة الموية اللي تغلي

تنبيه ثاني: خلوا المقادير كلها جاهزة وبجنبكم عند النار، لأن كل شي لازم يتم بسرعة

الصوص هذا أهم شي فيه برأيي:

١- كرملة السكر للدرجة المناسبة. السكر كل ما تسخن أكثر كل ما أعطى نكهة مختلفة، قلت حلاوته، ثقل قوامه، وتحول لونه لبني داكن
٢- استخدام ملح بحر غير ناعم يضاف بالأخير، راح يذوب شوي لكن تبقى قطع صغيرة جدا منه ما تذوب. هذي القطع لما تنوكل، تعطي قرمشة مالحة خفيفة، مع صوص ذايب وحالي.توليفة رهيبة. ممكن استخدام ملح عادي بس ملح البحر أفضل بسبب القرمشة اللي راح يعطيها، أو ممكن ملح عادي خشن

المقادير:

كوب سكر عادي
خمس ملاعق زبدة
نصف كوب كريمة خفق
رشتين ملح بحر. (أو ملح عادي أو خشن). ممكن التحكم بكمية الملح هنا حسب الرغبة. فوق رشتين راح توضح الملوحة بشكل أكبر

اوكي، أول شي أسويه أحط كوب السكر في مقلاة لعمل الصوصات، أو أي مقلاة تكون عميقة، أو قدر. بس من الأفضل يكون الوعاء هنا (أيا كان نوعه) حديد غير قابل للصدأ Stainless Steel أو دتش أوفن Dutch Oven. لأن النوعين هذول يمسكون الحرارة ويوزعونها كويس

IMG_8014

أحط المقلاة على نار متوسطة، وأنتظر السكر يبدا يتكرمل تحت وبالأطراف

IMG_8016

ممكن ياخذ خمس الى عشر دقايق حسب قوة النار ونوع المقلاة أو القدر. أهم شي لا تستعجلون وترفعون على النار. رفع النار ممكن يحرق السكر في الأخير حتى لو خففتوها بعدين

اوكي بعد ما يصير السكر زي الصورة اللي فوق، أبدا أرفع وأحرك المقلاة بشويش قدام و ورا كل نصف دقيقة عشان أحرك السكر وتتوزع الحرارة عليه وما أخليه ساخن بزيادة بمكان، وبمكان لا

بعدها بيصير كذا

IMG_8017

أستمر في التحريك لحد ما يذوب معظمه وتروح القطع البيضاء تماما. عندها بس أحركه بملعقة خشب أو بلاستيك أو “ويسك Whisk”

IMG_8018

ليه ما بديت تحريكه بالويسك من أول شي؟

لأني لو حركته بملعقة أو “ويسك Whisk” والقطع البيضاء موجودة، راح تلزق كمية كبيرة منها بالأداة اللي أحرك فيها وبالتالي أخسر ولو شوي من كمية السكر :/

أستمر أحركه وأنتظر لحد ما يصير لونه كذا

IMG_8020

وبعدها أشيله على طول من النار وأحط عليه الزبدة مباشرة

IMG_8022

وأحرك الزبدة على طول لحد ما تذوب كويس. مهم سرعة التحريك هنا عشان ما تحترق الزبدة. وانتبهوا. الزبدة لما تنحط راح تكوّن رغوة لمدة بسيطة تقريباً عشر ثواني، عشان كذا لازم المقلاة تكون عميقة أو تستخدمون قدر

IMG_8023

بعد ما أحرك الزبدة كويس وتختفي هي والرغوة

IMG_8024

أحط على طول نصف كوب كريمة الخفق، وبرضه أحركها على طول

IMG_8026

أحركها تقريباً نصف دقيقة لحد ما تختفي

لاحظوا ان الزبدة وكريمة الخفق ينحطون والمقلاة أو القدر مو على النار. كلهم راح يختلطون ويذوبون من حرارة السكر بس

بعد ما تختفي كريمة الخفق، أحط ملح البحر

IMG_8028

وأحركه شوي وبعدين أترك المقلاة أو القدر على جنب لحد ما يثخن قوام الصوص. ياخذ تقريباً نصف ساعة أو ساعة. وبعد كذا أحطه في جرة زجاج أو أي حافظه وأحفظه بالثلاجة.

كل ما بغيت استخدمه، أطلعه وأسخنه على نار هادية أو بالمايكرويف

لمدة كم يجلس بالثلاجة؟

غالباً الى تاريخ انتهاء كريمة الخفق اللي استخدمتوا. كريمة الخفق مبسترة أساساً وتم تسخينها على حرارة عالية لما حطيناها، بس احتياطاً، اعتبروا تاريخ انتهاءها هو تاريخ انتهاء الصوص

وبالهنا والعافية

13 تعليقات حتى الآن

  1. مرام 2015-04-22 at 4:16 AM - Reply

    الله يعطيك الف عافيه ع بالي اسوي تارت بالكراميل مغطى بالشكولاه و فوقه ملح بحر ، شكرا ع الطريقه راح اجربها .

    • محمد الفارس 2015-04-22 at 1:16 PM - Reply

      بالعافية

  2. maha 2015-04-25 at 1:26 AM - Reply

    ههههههه التنبيه بالصميم كنك داري ، قد سويت شيره ويوم خلصت غطيت اصبعي اذوقها 🙁 هه مدري كيف سهيت.

  3. الشفاء 2015-05-04 at 8:49 AM - Reply

    يعطيك العافية مجهود واضح اللهم اجعله مباركا لو سمحت رشتين ملح ممكن تساوي ملعقة صغيرة حقت تحريك الشاي

    • محمد الفارس 2015-05-04 at 9:43 AM - Reply

      أقل من كذا. رشة ملح يعني تشيل شوي بثلاث اصابع، الابهام والسبابة والوسطى

  4. sara ahmad 2015-05-05 at 12:00 AM - Reply

    تسلم ايديك شيف ممكن اعرف كم بالجرام الزبده

    • محمد الفارس 2015-05-05 at 7:48 AM - Reply

      الله يسلمك، ٧٠ جرام

  5. Rahma 2015-08-26 at 5:03 PM - Reply

    طريقة سهلة وجميلة تسلم يا شف

    • محمد الفارس 2015-08-31 at 12:10 PM - Reply

      شكراً لك

  6. MA.babeer 2016-01-30 at 5:37 PM - Reply

    السلام عليكم اخوي محمد كيف حالك حبيت اسألك لحم بلاك انجوس حق البرجر من وين احصلو وشكراً

    • محمد الفارس 2016-01-30 at 7:38 PM - Reply

      في الأسواق الكبيرة مثل التميمي والدانوب ولولو

  7. علي 2017-01-20 at 1:24 AM - Reply

    كيف احصل على كراميل لا احتاج الى تسخينه عند الاستعمال يعني يبقى سائل في اي وقت ؟
    مثل الموجود في السوبرماركت hershy’s

    • محمد الفارس 2017-04-25 at 3:36 PM - Reply

      تزيد نسبة الكريمة

تعليقك